Sumpa sang manggad kag katahum


Hinulugan, Tabun-acan, Pilar, Capiz.Salamat sa picture Ralph Ronald C. Rivera

Hinulugan, Tabun-acan, Pilar, Capiz.
Salamat sa picture Ralph Ronald C. Rivera

May mga tawo nga nagpakilala–
kag madamo pa ang maabot
Kag magpakilala–nga ang balatyagon
Kag panghunahuna kaangay sang busay
Nga wala nagauntat sa pag-ibwal
Sa paghigugma sa imo.

Apang, ano ang matuod, hinigugma ko?

Ang matuod, ikaw ang busay nga ginataklad
Sa kabukiran agudto makapaligo
Kag makapalitrato
Sa imo manggad kag katahum.

Pagkatapos sang tatlo, anum, ukon siyam
ka oras, bayaan ka nila kag ang ila
mga basura.

Kag kami, imo man mga anak,
ang nabilin kag nagapabilin nga nagasakit
ang buot sa pagpasipala.

Apang ngaa–
ngaa, hinigugma,
nga nagapinaukoy ka lang?

Ngaa nga sa ila pagpinaligo
kag pagpasasa sa imo manggad
wala sila ginlumsan?

Ukon, ginpasaruso sa mga ido buang
nga nagapanago sa imo kagulangan;

Ginpakagat sa imo mga man-og kag mga halo,
ginpalumpatan sa mga tiki kag tuko;

ginpadagit sa mga kabog kag kuyakyaknit
agudto indi na sila magbalalik?

Indi na sila pagpabalika,
malooy ka.

Indi na sila pagpabalika.

Sila nga nag-angkon sa imo
kaangay sa pag-angkon
Sa isa ka ulipon.

Sindaa sila:

pasakita ang ila tiyan,
patalanga sa imo dalan,
kag dal-a sa bangin
agudto hinali malagbong–
hinali malagbong–
kag indi na makabalik.

Kag kami,
kami nga ari nagapuyo
sa imo palibot,
kami nga indi makasarang
magmitlang sang amon luyag ituad,
kami nga sa kalinong sang panghunahuna
kag tagiposoon nagapanumpa
nga ihatag ang kabuhi sa imo,
Indi kami pagpabay-i.

Indi kami pagpabay-i.

Advertisements

3 thoughts on “Sumpa sang manggad kag katahum

  1. Gusto ipahibalo sa imo abyan JP ginpost ko ini sa akon site: tumandok. Ari iya lilnk: http://tumandok2011.blogspot.com/2013/03/sumpa-sang-manggad-kag-katahum.html

    Kun may pang-alaghag ka nga indi pwede ibalhag sa sini nga site, ipahayag lang kay pwede ta ina dayon ma-delete. Okay lang, abyan?

    2013/3/2 Pilar, Capiz

    > ** > JP Anthony D. Cuada posted: ” Hinulugan, Tabun-acan, Pilar, > Capiz.Salamat sa picture Ralph Ronald C. Rivera May mga tawo nga > nagpakilala– kag madamo pa ang maabot Kag magpakilala–nga ang balatyagon > Kag pa”

  2. Salamat sa pagpost sa imo blog, abyan Tumandok. Ginakalipay ko gid ang madamo nga nagabasa sang akon ginsulat. Tungod sa pag-post mo sa imo blog, nasigurado ko nga mas madamo pa gid ang makabasa sang akon binalaybay. Ang ginapamatokan man lang naton amo ang pag-angkon sang sinulatan sang iban.

  3. My family on mother side are pilar ,capiz,I still remember crossing ,the main bus stop,if your coming from roxas city ,on main road is pilar on your left side water tower,my Lola aurea Perez ,married major fexito Perez,two care Lola pinna at lolo Moises,been our family during Japanese war ,from crossing u can see my Lola house next bay bay,I still lolo pricko his house right side own rice mill this in 1977 1980 sky lab,my uncle the mayor NG pilar perying Perez,went everything clean ,organic,full of life my hard working,front house rice patty,by water sugar cane,sa tangkop si Ty Fred my si Bernadette bandana wish my old pilar still my home I use remember,my papa install all the electric power we have the best mammy soup

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s